ဈေးဝယ် သွားသော အမျိုးသမီးနှစ်ဦးပျောက်ဆုံးနေ
2021-12-05
စစ်ကိုင်းတိုင်း၊ တန့်ဆည်မြို့နယ် ကုန်းအိုင်ကျေးရွာနေ အမျိုးသမီး ၂ ဦးမှာ ဒီဇင်ဘာ၂ရက်နေ့ နေ့လယ်ပိုင်းတွင် ဈေးဝယ်ရန်ထွက်ရန် ထွက်သွားရာမှ ပျောက်ဆုံးသွားခဲ့ကြောင်း သိရသည်။
အိမ်သို့ အလည်အပတ် ရောက်ရှိလာသော မချိုဇင်ဦး၏သူငယ်ချင်းဖြစ်သူ မယဉ်မွန်နှင့်အတူ ဈေးဝယ်ထွက်ရန် အတွက် ဒီဇင်ဘာလ၂ရက်နေ့ နေ့လယ်ပိုင်းက ထွက်သွားပြီးနောက် အဆက်အသွယ် ပြတ်တောက်သွားခြင်း ဖြစ်သည်။
မချိုဇင်ဦးနှင့် မယဉ်မွန်တို့ကို အကြမ်းဖက်စစ်တပ်က ဖမ်းဆီးသွားသည်ဟု သတင်းများ ထွက်ပေါ်လာခဲ့သော် လည်း မိသားစုဝင်များအနေဖြင့် အတည်ပြုနိုင်ခြင်းမရှိကြောင်းလည်း သိရသည်။
လက်တလောတွင် တန့်ဆည်မြို့နယ်အတွင်း၌ အကြမ်းဖက်စစ်တပ်က တပ်စွဲထားပြီး စစ်အင်အား အများအပြားဖြင့် စစ်ဆေးခြင်း၊ ဖမ်းဆီးခြင်း များလည်း ပြုလုပ်လျက်ရှိကြောင်း သိရသည်။
ပြည်သူလူထုကို အကြောင်းအမျိုးမျိုးပြ ဖမ်းဆီးနေရာ အသားမည်းလျင် ကြက်ပေါင်ဖိနပ်များစီးထားလျင်ပင် ဖမ်းဆီးနေသကဲ့သို့ ဆိုင်ကယ်တစ်စီးတွင် လူနှစ်ဦးစီးနင်းခြင်းများ တွေ့ရှိလျင်လည်း ဖမ်းဆီးနေကြောင်း ဒေသခံ ကာကွယ်ရေးအဖွဲ့များကပြောသည်။
မချိုဇင်ဦး၏မိသားစုဝင်တစ်ဦးက”အရမ်းကို စိုးရိမ်တယ်ဗျာ။ အမျိုးသမီးတွေ ဖြစ်နေတဲ့အတွက်ကြောင့် သူတို့ရဲ့လုံခြုံရေးရော အသက်အန္တရာယ်ကိုရောပါ စိုးရိမ်တယ်ဗျ။ စစ်ကောင်စီကဖမ်းလား။ သူခိုးဓါးပြတွေက ဖမ်းထားတာလား။ အခြားပုံစံမျိုးနဲ့ ဒုက္ခရောက်နေသလား အရမ်းစိုးရိမ်တယ်” ဟု ပြောသည်။
"ထွက်သွားတုန်းကတော့ ဈေးဝယ်ထွက်ဖို့ပြောတယ်။ထွက်ဖို့သွားတော့ နေ့လယ်၂နာရီခွဲမှာ သူ့ဆီ အကြောင်းကိစ္စရှိလို့ ဆက်တဲ့အချိန်မှာ ဖုန်းဆက်လို့ မရတော့ဘူး။ ဒီနေ့အထိ အဆက်အသွယ်မရတော့ဘူး” ဟုမယဉ်မွန်၏ မိသားစုဝင်တစ်ဦးကဆိုသည်။
အကြမ်းဖက်စစ်တပ်နှင့် ဒေသခံကာကွယ်ရေး တပ်ဖွဲ့များအကြား ပစ်ခတ်မှုများလည်း ရှိနေရာ ပျောက်ဆုံးနေသူ နှစ်ဦး၏ လုံခြုံရေးအတွက် မိသားစုများက စိုးရိမ်လျက်ရှိသည်။